पोखरा, १५ माघ
पोखरा ९ नयाँबजारमा रहेको एयरलाइन्स फ्लाइट अटेन्डेन्ट एकेडेमीले ३ महिने कोर्स सञ्चालन गर्ने तयारीमा छ । छोटो समयमा प्रभावकारी नतिजा प्रदान गरिने उद्देश्यले कोर्सको अवधि छोट्याइएको हो ।
एकेडेमीकी बोर्ड निर्देशक अञ्जली खनालले ५ महिने कोर्सलाई घटाएर ३ महिने बनाउन लागिएको जानकारी दिइन् । कक्षा सञ्चालन भने २ घन्टाको हुनेछ । कोर्स अवधि कम गर्दा समयको बचत हुने विद्यार्थीलाई अन्य क्षेत्रमा पनि ध्यान दिन सक्ने तथा विद्यार्थीले छिटो कोर्स पूरा गरी रोजगारीका लागि तयारी गर्न सक्ने उनले बताइन् ।

एकेडेमीमा विद्यार्थीलाई जहाज उड्नुअघिदेखि यात्रुलाई सेवा दिनु र सुरक्षित अवतरणसम्मका प्रक्रियाबारे तालिम दिइने खनालले जानकारी दिइन् । तालिममा वायु सेवासँग सम्बन्धित आधारभूत ज्ञानदेखि क्याबिन क्रु सुरक्षा मापदण्डसम्म, व्यावसायिक सीप र व्यक्तिगत विकासमा ध्यान दिइने उनले बताइन् ।
‘नेपालमा आउने विदेशी एयरलाइन्समा २ नेपाली एयर होस्टेस अनिवार्य राख्ने नियम लागु गर्न सके नेपालको हवाई उद्योगमा फाइदा पुग्छ । यसले रोजगारका अवसर सिर्जना गर्ने, नेपालका एयर होस्टेसहरुको क्षमता र दक्षता बढाउने, र नेपालको पर्यटन क्षेत्रको प्रवर्धन गर्ने मौका प्रदान गर्नुका साथै नेपालको हवाई उद्योगलाई अन्तर्राष्ट्रिय स्तरमा प्रतिस्पर्धी बनाउन मद्दत पुग्छ,’ खनालले भनिन् ।
एकेडेमी सञ्चालक शोभा केसीले नेपालमा एयर होस्टेस (फ्लाइट अटेन्डेन्ट)को माग पछिल्ला वर्षमा उल्लेखनीय रुपमा बढिरहेको बताइन् । यसले विदेश यात्रा गर्ने, विभिन्न संस्कृति अनुभव गर्ने र राम्रो आयको अवसर पनि प्रदान गर्ने उनको भनाइ छ ।
तालिम शुल्क ५० हजार रुपैयाँ पर्छ । तालिममा सहभागी हुन १८ वर्ष पुगेको, कक्षा १२ उत्तीर्ण गरेको र उचाईं ५ फिट ३ इन्च हुनुपर्ने छ । ‘तालिममा वायुसेवा क्षेत्रमा लामो अनुभव भएका प्रशिक्षकबाट प्रशिक्षण दिइन्छ । हवाई सेवासम्बन्धी अभ्यासका लागि अत्याधुनिक उपकरणको प्रयोग गरिन्छ । विद्यार्थीले तालिम पूरा गरेपछि राष्ट्रिय तथा अन्तर्राष्ट्रिय एयरलाइन्समा क्याबिन क्रुका रूपमा करियर बनाउन सक्नेछन्,’ उनले भनिन् ।
एकेडेमीमा नेपाल एयरलाइन्सका पूर्व पाइलट जीवन निरौला, नेपाल एयरलाइन्सका पूर्व क्याबिन क्रु सान्त्वना तुलाचन, अग्नि एयरका पूर्व स्टेसन म्यानेजर रिजन रिजाल लगायत प्रशिक्षक रुपमा छन् । एयरलाइन्स फ्लाइट अटेन्डेन्ट एकेडेमी पोखरा, सन् २०१२ मा स्थापना भएको एयर होस्टेस तालिम केन्द्र हो ।

एकेडेमीले वायुसेवा क्षेत्रमा करियर बनाउने इच्छुकलाई एयर होस्टेस तथा क्याबिन क्रुका लागि आवश्यक व्यावसायिक तालिम प्रदान गर्दै आएको छ । एकेडेमीको उद्देश्य युवाहरुलाई वायु सेवा उद्योगसँग सम्बन्धित ज्ञान, सीप, र व्यावसायिक व्यवहारमा दक्ष बनाउनु हो ।