पोखरा ।
राष्ट्रिय युवा संघ नेपालको नवौं राष्ट्रिय महाधिवेशनको सन्दर्भमा संघको गण्डकी प्रदेश कमिटीको विस्तारित भेला आइतबार भएको छ । भेलामा गण्डकी प्रदेशबाट प्रतिनिधित्व गर्ने केन्द्रीय सदस्य, ११ जिल्लाका इन्चार्ज तथा अध्यक्ष, कास्की जिल्ला कमिटीका पदाधिकारीको सहभागिता रहेको संयोजक महेन्द्र गुरुङले बताए ।
भेलामा युवा संघका उपाध्यक्ष तथा गण्डकी प्रदेश इन्चार्ज सन्तोष रावलले गण्डकी प्रदेश कमिटीलाई पूर्णता दिइएको बताए ।
उनले कमिटी संयोजकमा महेन्द्र गुरुङ, सहसंयोजक विकास अधिकारीसहित प्रदेशका सबै जिल्लाको प्रतिनिधित्व हुने गरी समावेशी चरित्रको ७५ सदस्यीय कमिटी बनाएको जानकारी दिए ।
नेकपा (एमाले) केन्द्रीय कमिटीका सचिव तथा गण्डकी प्रदेशका इन्चार्ज पद्मा अर्यालले भेलामा युवा संघ लगायत पार्टीका सबै जनसंगठन नीति र विधिका आधारमा चल्नुपर्ने बताइन् । उनले वैचारिक रुपमा प्रशिक्षित र अनुशासित बन्न निर्देशन दिइन् ।
उनले आसन्न महाधिवेशनबाट चुस्त, दुरुस्त कमिटी निर्माण गरी युवा संघलाई व्यवस्थित बनाउन आग्रह गरिन् । गण्डकी प्रदेशका मुख्यमन्त्री खगराज अधिकारीले आगामी निर्वाचनमा एमालेको एकल बहुमत ल्याउनका लागि मुख्य अभियन्ता बन्न युवा संघलाई निर्देशन दिए ।