पोखरा , १९ माघ । गण्डकीका आन्तरिक मामिला तथा कानुनमन्त्री रोशनबहादुर गाहाकी बुहारीलाई जागिर दिन भन्दै भौतिक पूर्वधार शहरी विकास तथा यातायात मन्त्रालय गण्डकीले विभागीय कार्यालयलाई तोकादेश पठाएको छ ।
प्रदेशको भौतिक पूर्वाधार विकास तथा यातायात व्यवस्था मन्त्रालयले मातहतको यातायात व्यवस्था कार्यालय नवलपुरलाई पत्र लेखेर कम्प्युटर अपरेटर पदमा व्यवस्थापन गर्न भनेको छ । मन्त्रालयले कम्प्युटर पदमा नियुक्त हुने कर्मचारीको नामसहित कार्यालयलाई नै सेवा करारमा नियुक्त गर्न भन्दै पत्र पठाएको हो ।
प्रदेशका कानुनमन्त्री गाहाकी बुहारी सजिना थापालाई मन्त्रालयले पत्र लेखेर नियुक्त गर्न लगाएको हो । उनको शैक्षिक योग्यता १० +२ र कम्प्युटरको अफिस प्याकेज रहेको मन्त्रालयले लेखेको पत्रमा उल्लेख छ ।
गत माघ ६ गते मन्त्रालयले लेखेको पत्रमा लेखिएको छ, “गण्डकी प्रदेश सरकारबाट वार्षिक स्वीकृत अस्थायी दरबन्दी तेरिज अनुसार त्यहाँ कार्यालयमा रहेको अस्थायी कम्प्युटर अपरेटर पाँचौँ तहको रिक्त पदमा तपशील अनुसार योग्यता भएका निवेदकलाई नियमानुसार कार्यालयबाट नै सेवा करारमा व्यवस्थापन हुन आदेशानुसार अनुरोध छ ।” मन्त्रालयका प्रवक्ता उपसचिव टीकाराम पौडेलले आफूले पत्र लेखेको स्वीकार गर्दै निवेदन आएकाले व्यवस्थापन गर्न भनिएको बताए ।
थापाले यसअगाडि माघ ३ गते मन्त्रालयमा करार नियुक्ती पाऊँ भन्दै हस्तलिखित निवेदन पेस गरेकी थिइन् ।
यो निवेदनमा मुख्यमन्त्री खगराज अधिकारीले तोक लगाएका छन् ।
मन्त्रीलाई सम्बोधन गरेर लेखिएको निवेदनमा भनिएको छ, “नवलपरासी जिल्ला (ब.सु.पूर्व) यातायात कार्यलयमा कम्प्युटर अपरेटर पद रिक्त रहेको बुझिएकाले उक्त पदमा काम गर्ने मेरो योग्यता पुग्ने भएका हुँदा सो पदमा करारमा नियुक्तिका लागि सवि नम्र यो निवेदन पेस गरेको छु । उक्त पदमा नियुक्ति आएमा आफूलाई दिएको जिम्मेवार साथ पुरा गर्ने प्रतिबद्धता रहनेछ ।” यो निवेदनमा मुख्यमन्त्री खगराज अधिकारीले तोक लगाएका छन् ।
भौतिक पूर्वाधार मन्त्रालयले नै कर्मचारी भर्नाको लागि ‘सेवा करारमा प्राविधिक जनशक्ति छनौट सम्बन्धी कार्यविधि, २०७६’ पनि बनाएको छ । तर, यो कार्यविधिले सीमित पदमात्र चिन्ने मन्त्रालयका प्रवक्ता पौडेल बताउँछन् ।
“हाम्रो कार्यविधिले इन्जिनियर, सबइन्जिनियर र ल्याब टेक्निसियनलाई मात्रै कार्यविधि अनुसार नियुक्त गर्ने भनेको छ । कम्प्युटर अपरेटर पदलाई विज्ञापन आवश्यक पर्दैन, केन्द्रले पनि त्यस्तो गर्दैन । त्यो अस्थायी पद हो । एक वर्षका लागि स्वीकृत हुन्छ । अस्थायी दरबन्दी वार्षिक रूपमा मन्त्रिपरिषद्ले स्वीकृत गरेको हुन्छ,” उनले भने ।
मन्त्रालयमा ठाउँ खाली नभएकै कारण कार्यालयलाई प्रक्रिया पुर्याएर व्यवस्थापन गर्न भनिएको उनको दाबी छ ।
उनले भने, “कार्यालयलाई सबै अधिकार दिएको छ, निवेदन लिएर आउँछन्, तोक नलगाएर त भएन नि । मन्त्रालयमा खाली भएन, खाली भएसम्म आवश्यक प्रक्रिया पुर्याएर कार्यालयलाई व्यवस्थापन गर्न भनेका हौँ ।”
यातायात व्यवस्था कार्यालय नवलपुरका प्रमुख टेकबहादुर घर्तीले मन्त्रालयको पत्र पाएको तर नियुक्ति भइनसकेको जानकारी दिए ।
“उहाँहरूले आदेश गर्नुभएको छ, प्रक्रिया पुर्याएर नियुक्त गर्ने हो । आदेशले मात्रै हुँदैन,” उनले भने ।
मन्त्रालयका उपसचिव पौडेलले विज्ञापन आवश्यक नभएको बताएपनि घर्तीले भने विज्ञापन गर्नुपर्ने बताए ।
“विज्ञापन नै मन्त्रालय आफैँले गरेर पठाइदिएको भए हुन्थ्यो । यसअगाडि विज्ञापन गरेर नै आउँथे । विज्ञापनमार्फत आएकाहरूलाई स्वतः नियुक्ति दिने गरिएको थियो,” उनले भने, “उहाँ ९सजिना० अहिले काम सिक्ने हिसाबले काम गर्नुभएको छ ।”
कार्यालयमा कर्मचारी अभाव भनेको रहेको उनको भनाइ छ । आफूले पत्रबारे मन्त्रालयसँग मौखिक रूपमा कुराकानी गरेको पनि उनले बताए ।
“नियुक्त गर्नैपर्ने हो कि होइन मैले मन्त्रालयलाई पत्र लेखेर सोध्नेछु, मौखिक त सोधेको छु । अहिलेलाई नियुक्त नगर्नुहोस् भन्नुभएको छ,” उनले भने ।
यस्तै रोशन गाहाले आफ्नो सचिवालयमा प्रेस सल्लाहाकारमा भतिजा शुसान्त गाहामगर (अर्जुन)लाई नियुक्त गरेका छन् । फरक राजनितिक विचारधार भएको भतिजलाई प्रेस सल्लाहाकारमा नियुक्ती सँगै गाहालाई पाटी र पाटी निकट प्रेस सङ्गठन प्रेस चैतारीले विरोध गरिरहेको छ ।