दुई दिन अघिको जस्तो मौसमी अवस्थामा केही सुधार आएको मौसमविद्ले बताएका छन् । यद्यपि मनसुन सिजन जारी रहेकाले केही स्थानमा भारी वर्षा हुने र त्यसबाट क्षति पुग्न सक्ने सम्भावना भने कायमै रहने छ ।
जल तथा मौसम विज्ञान विभागको मौसम पूर्वानुमान महाशाखाले साउन २२ र २३ गते ३४ जिल्लामा अति जोखिम हुने भन्दै रेड अलर्ट जारी गरेको थियो । आज त्यो अवस्था नरहेको वरिष्ठ मौसमविद् राजु प्रधानाङ्गले जानकारी दिए । ‘हिजो अस्तीको जस्तो रेड अलर्ट अब छैन,’ उनले अनलाइनखबरसँग भने ।
महाशाखाले २१ गते विशेष बुलेटिन जारी गर्दै २२ गतेदेखि २३ गतेसम्म ३४ जिल्ला अति जोखिममा र ३६ जिल्ला मध्यम जोखिममा रहेकाले सतर्कता अपनाउन भनेको थियो । अति जोखिममा रहेका जिल्लामा रात्रिबस नचलाउन सरकारले निर्देशनसमेत दिएको थियो ।
त्यतिबेला मनसुन न्यूनचापीय रेखा नेपालतर्फ सरेको थियो । मनसुन न्यूनचापीय रेखा सरदर स्थानबाट उत्तरतिर सर्दा नेपालको आकाशमाथि हुन्छ र नेपालमा बढी वर्षा हुने गर्दछ । अहिले भने मनसुनको न्यूनचापीय रेखा सरदर स्थान (नेपालबाट दक्षिणतर्फ) सरेको छ । त्यसैले अघिल्ला दिनको जस्तो अति जोखिम नरहेको मौसमविद्को भनाइ छ ।