पोखरा । पोखराको मणिपाल शिक्षण अस्पताललाई करिब २० करोड राजश्व छुट दिएपछि एमालेले महानगरपालिका नै भ्रष्टाचारको दलदलमा फसेको आरोप लगाएको छ । कार्यपालिका सदस्यहरूकै आँखा छलेर मेयर धनराज आचार्य र प्रमुख प्रशासकीय अधिकृत श्यामकृष्ण थापाले गलत बाटोबाट निर्णय गरेको एमालेको आरोप छ । अस्पताल भवनको नक्सा पास सम्पन्न प्रमाणपत्र दिँदा करिब २० करोड छुट दिइएको महालेखा परीक्षकको प्रतिवेदनमा उल्लेख छ ।

अपारदर्शी निर्णयका शृङ्खला नरोकिएमा आन्दोलनका कार्यक्रम गर्न बाध्य हुने एमालेको चेतावनी छ । आचार्यले आफ्नै पार्टीबाट निर्वाचित जनप्रतिनिधिले समेत ध्यान नदिइएको भन्दै आवश्यक प्रक्रिया अपनाउनले बताएका छन् । पोखरामा एकीकृत समाजवादीका नेता मेयर छन् भने उपमेयर मञ्जुदेवी गुरुङ एमालेबाट निर्वाचित भएकी हुन् । यहाँको कार्यपालिकामा काँग्रेसको बहुमत छ भने नगरसभामा एमाले बहुमत छ । छुटको निर्णय भएकै डेढ वर्ष बितिसक्दा जनप्रतिनिधिहरू चाहिँ उक्त निर्णयबारे थाहा नभएको प्रतिक्रिया दिइरहेका छन् ।